وحبّة من ترابك ... بعبوة ناسفة

مع الاعتذار للست فيروز
.....

شو مش جاي على الشغل ؟
لا دخيلك الطريق بيخوف , بركي في شي لغم مخبّى تحت شي حجرة أوشجرة .
اها..طيب غيّر الطريق؟
والطريق التاني كمان مش آمن , في عصي كتير وفي حجارة أكتر.
طيب وموعدك بعد الضهر؟
كمان مش رايح , بتضمن ما تكون في عبوة ناسفة مثلا تحت شي كرسي ؟ أو بشي حفرة مردومة ؟
لا ما بقدر أضمن بس الموعد مهم؟
أي بعرف بس الأهم الروح يا خيي
معك حق... طيب وعشيّة مش نازل على السهرة؟
ما بظن , بالليل ما في كهربا وما بتعرف منين بينطلّك شي مقنّع.
صحيح.... طيب قاعد بالبيت يعني ؟
لا ما رح ابقى , شوي بيطلع خطاب أو بيان وبيبلش الرصاص بالهوا مابتعرف من أي شباك بتجيك شي رصاصة طائشة .
لكن طالع على السطح ؟
لا طبعا بكون صيد سهل لشي قناص مزروع على شي بناية .
لكن شو رح تعمل؟ جننتني ...!!!

يا خيي بدي روح انضم لشي حزب يتكفّل بمصاريفي ومصاريف عيلتي وتعليمهم , وساعتها بمشي بالشارع بدون خوف أو قلق من هالمفاجآت اللي بتنتظر كل واحد بيطلع من بيته , ولوصابني شي بموت شهيد .

وحبة من ترابك ....

أعلى الصفحة